Humiling ang Office of the Ombudsman sa Sandiganbayan Third Division na mag-inhibit si Associate Justice Ronald Moreno sa pagdinig ng kasong malversation laban kay dating Senador Ramon “Bong” Revilla Jr.

Kinumpirma nitong Martes ng isang miyembro ng prosekusyon na naghain ang Office of the Special Prosecutor ng Ombudsman ng mosyon para sa inhibition laban kay Moreno noong Lunes.

Si Moreno ay kabilang sa dalawang mahistrado ng Third Division na bumoto pabor sa pagpapahintulot kay Revilla na makapagpiyansa para sa kanyang pansamantalang kalayaan.

Sa botong 2-1, pinayagan ng Sandiganbayan Third Division si Revilla na makapagpiyansa ng P1 milyon.

Bukod kay Moreno, bumoto rin pabor sa piyansa si Associate Justice Fritz Bryn Delos Santos, habang si Associate Justice Karl Miranda, chairman ng Third Division, ay bumoto laban dito.

Ang mosyon ng Ombudsman ay inihain matapos ang naging boto ni Moreno na pabor sa pagpapalaya kay Revilla sa pamamagitan ng piyansa habang dinidinig ang kaso.

Nahaharap si Revilla sa kasong malversation of public funds kaugnay ng umano’y iligal na pagpapalabas ng P76.9 milyon para sa isang sinasabing “ghost” flood-control project ng Department of Public Works and Highways (DPWH) sa bayan ng Pandi, Bulacan.

Ayon sa prosekusyon, nagkaroon umano ng sabwatan sa pagpapatupad ng proyektong nagkakahalaga ng P92.8 milyon, kapalit ng umano’y 25 porsiyentong komisyon o bahagi sa pondo.

Mariing itinanggi ni Revilla ang mga akusasyon at patuloy na iginiit na wala siyang kinalaman sa umano’y iregularidad sa proyekto.