NAKATAKDANG bumiyahe sa France sina Interior and Local Government Secretary Jonvic Remulla at Ombudsman Jesus Crispin “Boying” Remulla upang makipag-ugnayan sa mga awtoridad doon kaugnay ng paghahanap kay dating Ako Bicol party-list Rep. Zaldy Co.

Kinumpirma ni Jonvic Remulla ang kanilang biyahe bilang bahagi ng mga hakbang ng pamahalaan upang matunton at mapaharap sa batas si Co, na nahaharap sa kasong plunder kaugnay ng umano’y mga iregularidad sa mga proyekto sa flood control ng pamahalaan.

Tutungo si Jonvic Remulla sa Lyon upang i-follow up ang kahilingan para sa pagpapalabas ng Interpol Red Notice laban kay Co.

Layunin nitong makatulong sa pagtukoy sa kinaroroonan ng dating kongresista at sa posibleng pag-aresto sa kanya, alinsunod sa mga umiiral na proseso.

Samantala, makikipagpulong naman si Ombudsman Remulla sa mga opisyal ng France, kabilang ang mga kinatawan ng Justice Ministry sa Paris, upang talakayin ang mga legal at diplomatic na hakbang kaugnay ng paghahanap kay Co.

Iniulat na maaaring nasa France o iba pang bahagi ng Europe si Co, bagama’t hindi pa ito opisyal na nakukumpirma ng mga awtoridad.

Patuloy ding iniimbestigahan ng Ombudsman ang iba pang mga personalidad na iniuugnay sa kontrobersiya sa mga proyekto sa flood control, kabilang si Sen. Loren Legarda.

Sinabi ni Ombudsman Remulla na determinado ang pamahalaan na habulin ang mga indibidwal na lumalabag sa batas saanman sila magtungo.

Ayon kay Remulla, “paliliitin natin ang mundo” para sa mga lumalabag sa batas.