MULING arestado ang isang babae na may 28 kaso, kabilang ang 23 insidenteng may kaugnayan sa pagnanakaw, matapos umanong dukutin at tangayin ang wallet ng isang mamimili sa loob ng supermarket sa Barangay Novaliches Proper, Quezon City, ayon sa pulisya nitong Miyerkules.

Batay sa report ng Quezon City Police District (QCPD) Novaliches Police Station 4, dakong alas 10 ng umaga nang Martes nang dukutin ng suspek ang wallet ng babaeng biktima.

Una umanong nilapitan ng suspek ang biktima habang namimili at inalok ng libreng tissue at suka.

Ginamit umano ng suspek ang pagkakataon upang mailihis ang atensyon ng biktima bago palihim na kunin ang wallet nito.

Ayon sa QCPD, matapos makuha ang wallet ay nagpatuloy umano ang suspek sa pag-ikot sa mga pasilyo ng supermarket.

Napansin ng biktima na nawawala ang kanyang wallet at agad na humingi ng tulong sa security personnel ng establisimyento.

Nakipag-ugnayan naman ang mga guwardiya sa mga rumespondeng pulis.

Agad na natunton ng mga awtoridad ang suspek sa loob mismo ng supermarket at nasukol ito.

Nabawi mula sa suspek ang ninakaw na wallet.

Ayon sa QCPD, may kabuuang 28 kaso nang naitala laban sa suspek mula pa noong 2014. Kabilang dito ang 23 kaso na may kaugnayan sa pagnanakaw, gaya ng theft, pickpocketing at iba pang uri ng pagnanakaw, gayundin ang ilang kaso ng estafa at isang kaso ng paglabag sa Comprehensive Dangerous Drugs Act.

Ang mga naitalang kaso ay nagmula sa Quezon City, Manila, Marikina, Caloocan, Pasay, Camarines Norte at Aklan, ayon sa pulisya.

Nananatili sa kustodiya ng pulisya ang suspek at isasailalim sa inquest proceedings sa Quezon City Prosecutor’s Office.