PATAY ang isang 42-anyos na lalaki matapos masagasaan ng isang Toyota Vios na umano’y nakikipagkarera sa isa pang sasakyan sa Gov. M. Cuenco Avenue, Barangay Banilad, Cebu City, pasado alas-3 ng madaling-araw nitong Biyernes, Setyembre 11.

Nakilala ang biktima na si Ralph Salise, residente ng Barangay Banilad, na tumatawid sa national highway gamit ang pedestrian lane nang biglang salpukin ng humaharurot na Toyota Vios.

Isinugod si Salise sa ospital ngunit idineklarang dead on arrival ng attending physician.

Ayon sa pulisya, nagtamo ng malulubhang pinsala sa iba’t ibang bahagi ng katawan at ulo ang biktima.

Natukoy na ng mga awtoridad ang driver ng Toyota Vios, ngunit nakatakas ito at patuloy na tinutugis para papanagutin sa krimen.

Samantala, naaresto naman ng pulisya ang driver ng isa pang sasakyan, isang Toyota Raize, na umano’y tumulong sa pagtakas ng driver ng Vios.

Batay sa imbestigasyon, galing sa isang kalapit na gasoline station ang biktima at tumatawid sa highway sa pamamagitan ng pedestrian lane nang salpukin siya ng Toyota Vios.

Napag-alaman ng pulisya na bago ang insidente ay nakikipagkarera umano ang driver ng Toyota Vios sa kanyang kaibigang sakay ng Toyota Raize.

Matapos masagasaan ang biktima, huminto at ipinarada ng driver ng Vios ang sasakyan malapit sa gasoline station. Sinundan ito ng Toyota Raize at huminto rin malapit sa Vios.

Bumaba ang driver ng Vios kasama ang kanyang menor de edad na pasahero at sumakay sa Toyota Raize bago sila nagtangkang tumakas sa lugar.

Tinangka ng isang Green Taxi na harangan ang kanilang daan upang mapigilan ang pagtakas, ngunit binangga umano ng driver ng Toyota Raize ang taxi bago mabilis na umalis sa lugar.

Kalaunan ay bumalik ang driver ng Toyota Raize sa pinangyarihan ng aksidente. Itinuro siya ng mga saksi sa mga pulis kaya agad siyang inaresto.

Sa pagpapatuloy ng imbestigasyon, nalaman ng mga awtoridad na ibinaba ng driver ng Toyota Raize ang driver ng Toyota Vios malapit sa isang commercial establishment sa Barangay Basak, Mandaue City.

Dahil sa pagkakaaresto sa driver ng Raize, na residente ng isang subdivision sa Barangay Lahug, Cebu City, natukoy ng mga awtoridad ang pagkakakilanlan ng driver ng Vios.

Gayunman, hindi pa batid ng pulisya kung saan eksaktong nakatira ang driver ng Vios at patuloy pa rin ang paghahanap sa kanya para sa kanyang pagkakaaresto.

Nasa detention cell ng Cebu City Police Office ang naarestong driver habang hinihintay ang pagsasampa ng mga kaso laban sa kanya.

Samantala, ang driver ng Toyota Vios na nananatiling nakatakas ay mahaharap sa kasong Reckless Imprudence Resulting in Homicide kaugnay ng pagkamatay ni Salise