Humingi umano o nag “solicit” si Senador Rodante Marcoleta ng halagang P20 milyon mula sa negosyanteng si Aristotle Viray, isa sa mga donor na iniugnay sa plunder case na kinasasangkutan ng kabuuang P75 milyon, ayon sa isang testigo sa Sandiganbayan nitong Huwebes.

Inilahad ni Maria Melinda Mananghaya-Henson ng Field Investigation Bureau (FIB) ng Office of the Ombudsman ang alegasyon habang dinidinig ng Sandiganbayan Third Division ang petisyon para sa piyansa nina Marcoleta, dating Rep. Mike Defensor, at mga negosyanteng sina Joseph Espiritu at Viray.

Si Mananghaya-Henson ang nanguna sa fact-finding investigation ng Ombudsman kaugnay ng kaso.

Sa kabuuang P75 milyon na tinukoy sa kaso, P20 milyon umano ang nagmula kay Viray.

Gayunman, hindi agad malinaw kung ang buong halagang ito ang tinutukoy sa umano’y solicitation.

Sa mga clarificatory question ni Associate Justice Karl Miranda, chairperson ng Sandiganbayan Third Division, sinabi ni Mananghaya-Henson na nakasaad sa counter-affidavit ni Viray sa preliminary investigation ng Ombudsman na si Marcoleta umano ang nanghingi ng nasabing halaga.

Ang pahayag ay bahagi ng mga testimonya at ebidensiyang inihaharap sa pagdinig sa bail petition ng mga akusado