LIMA ang iniulat na nasaktan makaraang bumagsak ang elevator ng isang dialysis clinic na matatagpuan sa Barangay Kalaklan, Olongapo City umaga ng Lunes.

Batay sa impormasyon, pasado alas 6 ng umaga nang maganap ang insidente sa ikalawang palapag na gusali ng Dialysis clinic sa naturang lugar.

Sinasabing pumalya umano ang kable ng elevator bago huminto ng ilang segundo hanggang sa ito ay tuluyang bumagsak sa unang palapag.

Napag alamang nasa limang indibidwal na pawang mga dialysis patients ang sakay at nasaktan sa pag bagsak ng elevator.

Agad namang binigyan ng atensyong medikal ang mga pasyente na karamihan ay nakaranas ng pananakit ng kanilang hita, bewang at braso.

Nabatid na unang batch ng mga isasalang palang na mga pasyente sa dialysis machine ang naging biktima sa insidente.

Patuloy namang tinutukoy ng mga awtoridad ang sanhi ng pagka diskaril ng kable ng elevator.