NASAWI ang isang 63-anyos na Amerikanong turista matapos umanong hampasin ng silya sa gitna ng suntukan sa isang bar sa Panglao, Bohol nitong Sabado ng gabi, Setyembre 26.

Kinilala ang biktima sa alyas na “Williams,” na kasalukuyang nakatira sa isang resort sa Barangay Tawala, Panglao.

Ayon sa Bohol Tourist Police Unit, naganap ang insidente sa Escape Bar sa kahabaan ng Alona.

Nakatanggap ang pulisya ng ulat mula sa isang concerned citizen bandang alas-11:45 ng gabi hinggil sa nagaganap na away, dahilan upang agad na rumesponde ang mga awtoridad sa lugar.

Nagkaroon umano ng mainitang pagtatalo sa hindi pa malamang dahilan sina Williams at isang 41-anyos na Pilipino habang kapwa umano nasa impluwensiya ng alak.

Nauwi ang pagtatalo sa suntukan at sa gitna ng komprontasyon, sinabi ng pulisya na kumuha umano ng silya ang suspek at hinampas si Williams, dahilan upang mawalan ito ng malay.

Isinugod ang biktima sa Governor Celestino Gallares Memorial Medical Center sa Tagbilaran City.

Gayunman, idineklarang dead on arrival si Williams dakong alas-12:20 ng madaling-araw ng Linggo, Setyembre 27.

Inaresto naman ng rumespondeng mga pulis ang suspek na nasa lugar pa ng pinangyarihan.

Patuloy ang imbestigasyon ng pulisya kaugnay sa kung ano ang punot dulo ng insidente.