Isang 33-anyos na lalaki ang nasawi matapos pagbabarilin habang naglalakad pauwi sa Purok 4, Sitio Pantaron, Barangay Banlag, Valencia City, Bukidnon Sabado ng gabi.

Batay sa paunang imbestigasyon ng pulisya, dakong alas-7 ng gabi nang maganap ang insidente habang ang biktima ay mag isang naglalakad pauwi.

Sinasabing nilapitan umano ang biktima ng isang lalaki at mabilis na pinaputukan ng tatlong beses.

Tinamaan ang biktima sa dibdib, tiyan at hita na naging sanhi ng kanyang agarang pagkamatay.

Ayon kay Police Lt. Col. Hope Mark Orbuda, OIC chief ng Valencia City Police Station, isang tao na ang tinukoy na person of interest na sinasabing dating live-in partner ng kasalukuyang kinakasama ng biktima.

Dahil dito, kabilang sa tinitingnang anggulo ng mga awtoridad ang selos o personal na alitan bilang posibleng motibo sa krimen, bagama’t patuloy pa ang imbestigasyon upang matukoy ang tunay na dahilan ng pamamaril.

Agad inilunsad ng pulisya ang Oplan Shield at nagsagawa ng hot pursuit operation upang mahanap at maaresto ang suspek.