ISANG Grade 11 student ang nasawi habang apat na iba pang estudyante ang nawawala matapos tangayin ng biglaang pagragasa ng tubig habang sila ay naliligo sa ilog sa Roseller T. Lim, Zamboanga Sibugay noong Huwebes, Setyembre 24.

Sa ulat ng pulisya nitong Sabado, kinilala ang nasawing biktima na isang estudyanteng nagngangalang Dave, habang patuloy na pinaghahanap ang apat pa nitong kasama.

Batay sa paunang imbestigasyon ng Roseller T. Lim Municipal Police Station (RT Lim MPS), pawang mga Grade 11 students mula sa Surabay National High School ang nagtungo sa ilog sa Purok Santan bandang alas-4:30 ng hapon upang maligo.

Bigla umanong bumuhos ang malakas na ulan sa lugar na naging sanhi ng mabilis na pagtaas ng tubig sa ilog at pagbuo ng malakas na agos na tumangay sa limang estudyante.

Nakaligtas naman ang anim pang estudyante sa insidente.

Personal na nagtungo sa RT Lim MPS ang isang municipal rescuer upang i-turn over sa pulisya ang anim na estudyanteng nailigtas.

Patuloy naman ang search and rescue operations ng mga awtoridad upang mahanap ang apat na nawawalang estudyante.