ISANG 45 anyos na magsasaka ang pinagbabaril at napatay sa Maguindanao del Sur sa kabila ng ipinatutupad na gun ban sa Bangsamoro Autonomous Region in Muslim Mindanao (BARMM) kaugnay ng makasaysayang parliamentary elections sa darating na Setyembre 14.

Nakilala ng Police Regional Office-BARMM ang biktima na si Ebrahim Kalotig Timbao, residente ng Barangay Datu Bakal, Shariff Saydona Mustapha, Maguindanao del Sur.

Ayon kay Police Capt. Steffi Salanguit, tagapagsalita ng PRO-BARMM, nitong Lunes, ilang persons of interest ang tinututukan ngayon ng mga imbestigador kaugnay ng krimen na naganap dakong alas-5:50 ng hapon ng Linggo sa Barangay Dilembong, Shariff Saydona Mustapha.

Sinabi naman ni Police Capt. Yasher Hadjirulla, acting chief ng Shariff Saydona Mustapha Municipal Police Station, pauwi na ang biktima sakay ng kanyang motorsiklo nang pagbabarilin sya ng mga armadong suspek na sakay ng isang minivan na walang plaka.

Agad na nasawi si Timbao sa lugar ng insidente.

Kinuha ng pamilya ang bangkay ng biktima at dinala ito sa kanilang tahanan sa Barangay Datu Bakal para sa Islamic burial.

Nakarekober naman ng Scene of the Crime Operatives (SOCO) ang siyam na basyo ng bala na hinihinalang sa kalibre 5.56mm.

Inaalam pa ng pulisya ang motibo at ang mga nasa likod ng krimen.