SA halip na silid paaralan ay diretso sa kulungan ng pulisya ang isang college student makaraang magbiro ito na may bomba sa kanyang bag habang sya ay kinakapkapan sa gate ng pinapasukang unibersidad sa Argao City, Cebu, Martes ng hapon.

“Baka may bomba diyan at sumabog,” ang pabirong sinabi ng 20 anyos na estudyante sa security guard na nagsasagawa ng inspeksyon sa kanyang bag.

Gayunman, hindi nagbiro ang guwardiya at itinuring na seryosong banta ang sinabi ng estudyante kung kayat agad ipinaalam sa Student Affairs Office (SAO) ng paaralan ang pangyayari.

Naganap ang insidente pasado alas-3 ng hapon nitong Agosto 25 sa main entrance ng hindi na pinabanggit na paaralan.

Matapos ipaalam ng guwardiya ang insidente, tumawag ang Dean of Student Affairs sa pulisya dahil sa bigat ng naturang banta.

Kalaunan, isinuko sa pulisya ang estudyante para sa kaukulang imbestigasyon.

Ayon kay Police Staff Sergeant Mark Anthony Dicdican, imbestigador ng Argao Police Station, naisampa na nitong araw ng Miyerkules, Agosto 26 ang reklamo laban sa estudyante.

Sinabi ni Dicdican na kinasuhan ang estudyante dahil sa paglabag sa Presidential Decree No. 1727, na nagpaparusa sa malisyosong pagpapakalat ng maling impormasyon hinggil sa mga bomba at pampasabog.

Paalala ng pulisya sa publiko, seryosong usapin ang pagbibiro tungkol sa bomba, maging sa paliparan, pampublikong sasakyan, paaralan, o iba pang pampublikong lugar, dahil maaari itong humantong sa pananagutan sa ilalim ng batas.