SINUSPINDI ng Land Transportation Office (LTO) nang 90 araw ang lisensya ng driver ng isang itim na sedan na nasagi ng isang rumerespondeng fire truck sa Macabulos Street, Barangay Bangkal, Makati City noong Sabado, Setyembre 12, 2026.

Naging viral sa social media ang insidente matapos makuhanan ng video ang fire truck na dumaraan sa masikip na bahagi ng kalsada habang patungo sa isang sunog.

Batay sa paunang impormasyon, nahirapan ang fire truck na makadaan dahil sa mga sasakyang nakaparada o naka-double park sa magkabilang gilid ng kalsada.

Sa pagtatangkang makalusot sa masikip na espasyo, nasagi at nagitgit ng fire truck ang gilid ng nakaparadang itim na sedan.

Agad namang nagpatuloy sa pagresponde ang mga bombero sa sunog.

Ayon sa mga ulat, kontrolado na ang sunog nang makarating ang mga rumespondeng bombero at usok na lamang ang kanilang inabutan.

Kasunod ng insidente, nagpalabas ang LTO ng Show Cause Order (SCO) laban sa driver at rehistradong may-ari ng sedan.

Pinatatawag sila sa Intelligence and Investigation Division (IID) ng LTO sa Setyembre 18, 2026 upang magsumite ng kani-kanilang sinumpaang salaysay o sworn explanation kaugnay ng insidente.

Bukod dito, ipinataw ng LTO ang 90-araw na preventive suspension sa lisensya ng driver habang isinasagawa ang imbestigasyon.

Ayon sa LTO, maaari pang humantong sa pagkansela o pagbawi ng lisensya ang kaso kung mapatutunayang ang driver ay isang “improper person to operate a motor vehicle,” kabilang ang posibleng pananagutan kaugnay ng pagharang o ilegal na pagpaparada na nakahahadlang sa daanan ng emergency vehicles.

Samantala, naging sentro rin ng diskusyon sa social media ang pananagutan sa pagkasira ng sedan.

Sa ilalim ng mga probisyon ng Fire Code of the Philippines, may mga sitwasyong pinapayagan ang mga bombero na gumawa ng kinakailangang hakbang upang mabilis na makarating sa lugar ng sunog o emergency.

Gayunman, ang partikular na pananagutan sa pinsala sa sasakyan ay nakadepende pa rin sa mga resulta ng imbestigasyon at sa aktuwal na mga pangyayari sa insidente.

Patuloy na sinusuri ng mga awtoridad ang insidente, kabilang ang pagkakaparada ng sedan at ang naging maneuver ng fire truck, upang matukoy ang kaukulang pananagutan ng mga sangkot.

Paalala ng mga awtoridad: Huwag mag-double park o mag-iwan ng sasakyan sa lugar na maaaring humarang sa daanan ng mga fire truck, ambulansya at iba pang emergency vehicle. Sa oras ng sakuna, maaaring bawat segundo ay mahalaga sa pagsagip ng buhay