ARESTADO ang isang itinuturing na high-value drug suspect matapos masamsam ang tinatayang nasa P20.4 milyong halaga ng hinihinalang shabu sa isinagawang buy-bust operation sa Barangay Mercedes, Zamboanga City nitong Miyerkules ng hapon.

Kinilala ng pulisya ang suspek sa alyas na “Biik,” 30-anyos, residente ng Barangay Gata, Talipao, Sulu.

Itinuturing umano ang suspek na kabilang sa mga pangunahing suspek sa illegal drug trade sa Zamboanga Peninsula o Region 9.

Pinangunahan ng Regional Drug Enforcement Unit 9 (RDEU-9) ang operasyon kasama ang iba pang law enforcement units bandang alas-3:55 ng hapon sa Calle Real.

Naaresto agad ang suspek matapos nitong makipagtransaksiyon sa isang undercover police operative.

Nakuha mula sa kanya ang tatlong heat-sealed na transparent plastic pack na naglalaman ng tatlong kilo ng hinihinalang shabu, na tinatayang nagkakahalaga ng P20,400,000.

Dinala ang mga nakumpiskang droga sa Regional Forensic Unit 9 para sa qualitative at quantitative examination upang makumpirma ang kanilang laman at timbang.

Samantala, nananatili sa kustodiya ng Zamboanga City Police Station 4 ang suspek habang inihahanda ang pagsasampa ng kaukulang kaso sa paglabag sa Republic Act 9165 o Comprehensive Dangerous Drugs Act of 2002.