LIMANG indibidwal ang dinakip ng mga operatiba ng Criminal Investigation and Detection Group Regional Field Unit 3 (CIDG RFU3) sa magkahiwalay na operasyon laban sa ilegal na pagbebenta ng petroleum products sa Zambales araw ng Miyerkules, September 2.

Ayon kay Police Col. Grant Gollod, hepe ng CIDG RFU3, ang mga operasyon na nagresulta sa pagkakasamsam sa kabuuang 50,737 litro ng gasolina na nagkakahalaga ng P4 milyon.

Sa unang operasyon, nagsagawa ang mga operatiba ng buy-bust operation sa isang gasoline station sa Barangay Inhobol, Masinloc, kung saan tatlong katao ang naaresto dahil sa umano’y pagbebenta ng gasolina nang walang kaukulang pahintulot mula sa Department of Energy (DOE).

Sinabi ni Gollod na walang Certificate of Compliance (COC) ang naturang gasoline station.

Nakumpiska sa operasyon ang humigit-kumulang 33,249 litro ng gasolina na nagkakahalaga ng P2.6 milyon.

Sa ikalawang operasyon sa isang gasoline station sa Barangay Patrocinio, San Narciso, dalawang suspek naman ang naaresto.

Nakumpiska sa lugar ang tinatayang 17,488 litro ng gasolina na nagkakahalaga ng P1.3 milyon.

Posibleng maharap sa mga kasong paglabag sa Republic Act No. 8479, o Downstream Oil Industry Deregulation Act of 1998, at iba pang umiiral na regulasyon hinggil sa pagbebenta at pamamahagi ng mga produktong petrolyo ang mga suspek