NAPATAY ng pulisya ang isang umano’y kilalang gun-for-hire at personalidad sa ilegal na droga at wanted kaugnay ng insidente sa Mamasapano noong 2015, sa nangyaring engkwentro sa Maguindanao del Sur nitong Linggo ng umaga.

Ayon kay Police Capt. Steffi Salanguit, tagapagsalita ng Police Regional Office-Bangsamoro Autonomous Region (PRO-BAR), ang napaslang na suspek na si Rambo London Guiasalim, alyas “London,” residente ng Barangay Kuloy, Shariff Aguak, Maguindanao del Sur, ay matagal ng tinutugis ng mga awtoridad dahil sa mga kasong pagpatay sa ilang personalidad gaya kay Alfredo Amelista, dating municipal administrator ng Shariff Aguak, bukod pa sa umano’y illegal drug activities at ilang insidente ng carnapping.

Sinabi ni Salanguit na si London ay kabilang umano sa mga nagsagawa ng pagpaslang sa 44 na miyembro ng elite Special Action Force (SAF) ng Philippine National Police (PNP) sa Mamasapano noong 2015.

Isinagawa ng Provincial Mobile Force Company, Shariff Aguak Municipal Police Station at iba pang police units sa ilalim ng Maguindanao del Sur Police Provincial Office ang operasyon para ipatupad ang warrant laban kay London sa kanyang hideout sa nabanggit na lugar.

Sa halip na sumuko ay nakipag barilan pa si London sa mga awtoridad hanggang wala na itong buhay na bumulagta.

Nasugatan naman sa insidente ang kanyang asawa na si Marisa Bukanan Khalid, habang naaresto ang isa pa nilang kasama na kinilalang si Tato Abdul Edzong, alyas “Cobra.”

Narekober ng mga pulis sa encounter site ang ilang mga baril, Granada at ilang bulto ng hinihinalang shabu.

Tinawag naman ng Maguindanao del Sur police ang operasyon na “London is Falling Down.”