ARESTADO ang isang police vlogger makaraan nitong halayin ang menor de edad na babae sa isang sementeryo sa bayan ng Villanueva sa Negros Oriental nitong Sabado ng gabi.

Nakakulong ngayon sa Misamis Oriental Provincial Police Office (MOPPO) ang suspek na may ranggong Police Staff Sergeant at Vlogger ng dati nitong presinto sa Villanueva Municipal Police Station (VMPS).

Ang naturang police vlogger ay inakusahan ng panghahalay ng isang 15 anyos na babae sa loob ng pampublikong sementeryo.

Batay sa report ng pulisya, dinala ng suspek ang biktima sa isang madilim na bahagi ng sementeryo at duon isinagawa ang krimen.

Nakapagsumbong umano ang biktima sa mga awtoridad kinabukasan na dahilan upang arestuhin ang suspek ng kanyang mga kabaro sa Villanueva Municipal Police Station (VMPS).

Naisampa na ang kasong rape sa ilalim ng Republic Act No. 8353 o Anti-Rape Law of 1997 para sa inquest proceedings sa tanggapan ng piskalya.

Humingi naman ng paumanhin sa publiko si Misamis Oriental Provincial Police Office (MOPPO) Director Police Colonel Ali Abanales kaugnay ng insidente.

Ayon kay Abanales, lumilitaw sa paunang imbestigasyon na isang isolated incident at personal na pagkakasala ito ng suspek.

Tiniyak ng opisyal na agad ding isasampa ang kaukulang administrative case laban sa suspek bilang bahagi ng proseso upang mapatalsik ito sa serbisyo kung mapatutunayang nagkasala.