In photo : Mula sa mataas na gusali ay kita ang malaking bahagi na pinsala sa mga kabahayang tinutupok ng apoy habang pilit namang inaapula ng tubig ng mga rumespondeng mga bumbero sa Waling Waling Street, Barangay Central, Quezon City .

UMABOT sa Fifth Alarm ang sunog na sumiklab sa isang residential area sa Waling-Waling Street, Barangay Central, Quezon City Martes ng hapon.

Ayon sa Bureau of Fire Protection-National Capital Region (BFP-NCR), nagsimula ang sunog bandang 12:47 ng hapon.

Pagsapit ng 1:00 ng hapon, umakyat ito sa Second Alarm, sinundan ng Third Alarm alas-1:10 ng hapon.

Pagsapit ng alas-1:27 ng hapon, itinaas naman ang sunog sa Fourth at kalaunan ay Fifth Alarm dahil sa patuloy na pagkalat ng apoy sa mgkakadikit na kabahayan.

Idineklarang under control ang sunog alas-2:47 ng hapon.

Karamihan sa mga bahay na naapektuhan ay gawa sa mga light materials, kaya mabilis na kumalat ang apoy sa residential area na malapit sa Lung Center of the Philippines.

Naging dagdag na hamon din sa mga residenteng naapektuhan ang malakas na ulan na may kasamang pagkulog at pagkidlat habang isinasagawa ang pag-apula sa sunog.

Pansamantalang sumilong sa ulan ang ilang residenteng nawalan ng tirahan habang patuloy ang operasyon ng mga awtoridad sa lugar.

Patuloy namang inaalam ng mga awtoridad ang sanhi ng sunog at kabuuang halaga ng pinsala.

Wala pang inilalabas na opisyal na ulat hinggil sa posibleng mga nasawi o nasugatan.