IBINASURA ng Sandiganbayan Third Division nitong Martes ang mosyon ni dating senador Ramon “Bong” Revilla Jr. na pagpapa-inhibit kay Associate Justice Karl Miranda, ang nag-iisang mahistradong tumutol sa kanyang aplikasyon para sa piyansa, upang hindi na ito makilahok sa paglilitis ng kanyang kasong malversation.

Sa resolusyong may petsang Setyembre 24, sinabi ng anti-graft court na walang sapat na batayan ang ikalawang Motion for Inhibition ni Revilla na naglalayong pigilan si Miranda na lumahok sa paglilitis sa kaso ng dating senador at anim nitong kapwa akusado.

Ang kaso ay nag-ugat sa umano’y ghost flood control project ng Department of Public Works and Highways (DPWH) sa Pandi, Bulacan na nagkakahalaga ng P92.8 milyon.

Ayon sa Sandiganbayan Third Division, walang merito ang ikalawang mosyon ni Revilla kaya kinakailangang ipagpatuloy ni Miranda ang kanyang tungkulin bilang mahistrado sa naturang kaso.

Sa kanyang mosyon, iginiit ni Revilla na dapat mag-inhibit si Miranda dahil may kaugnayan umano ito sa abogado ng state witness at dating DPWH Undersecretary Roberto Bernardo.

Sinabi rin ni Revilla na umano’y labis na umasa si Miranda sa testimonya ni Bernardo at nagpakita na ito ng pagkiling bago bumoto laban sa kanyang aplikasyon para sa piyansa.

Kinumpirma ng korte na kapatid ni Miranda si Atty. Buenaventura Miranda, na siyang abogado ni Bernardo.

Gayunman, sinabi ng Third Division na hindi sapat ang naturang relasyon upang maging malinaw at kapani-paniwalang ebidensiya ng pagkiling o pagtatangi ni Justice Miranda laban kay Revilla na maaaring maging dahilan para sa kanyang pagpapa-inhibit.

Muling binigyang-diin ng korte ang nauna nitong resolusyon noong Pebrero 10 kung saan una na nitong ibinasura ang mosyon ni Revilla para sa pagpapa-inhibit kay Miranda.

Sa naturang resolusyon, sinabi ng korte na si Bernardo ay hindi partido sa kaso kundi isang testigo lamang. Dagdag pa nito, ang mga prosecutor—at hindi si Atty. Miranda—ang nagharap kay Bernardo bilang testigo.

Iginiit din ni Revilla na umano’y labis na umasa si Miranda sa testimonya ni Bernardo na wala umanong sapat na corroboration nang ilabas nito ang kanyang hiwalay na opinyon sa pagtanggi sa kanyang aplikasyon para sa piyansa.

Ngunit ayon sa Sandiganbayan, ang Separate Opinion ni Miranda ay naglalaman din ng mga pagtukoy sa testimonya ng iba pang mga saksi at sa iba pang dokumentaryong ebidensiya ng prosekusyon.

Binigyang-diin ng korte na ang isang desisyong hindi pabor sa isang partido, nang walang iba pang ebidensiya, ay hindi sapat upang patunayang may pagkiling o pagtatangi ang isang mahistrado na magiging dahilan para sa kanyang pagpapa-inhibit.