PALALAWAKIN ng Philippine Health Insurance Corp. (PhilHealth) ang mga benefit package nito upang masaklaw ang mga pasyenteng na-admit sa ospital nang wala pang 24 oras, simula Setyembre 18, basta’t matugunan ang itinakdang kwalipikasyon at requirements.

Alinsunod sa Republic Act No. 11223 o Universal Health Care Act at PhilHealth Circular No. 2026-0013 na inilabas noong Setyembre 11, maaari nang magsumite ng reimbursement claims ang mga miyembro at kanilang dependents kahit wala pang 24 oras ang kanilang pananatili sa ospital.

Gayunman, para lamang ito sa mga pasyenteng may “malubha, seryoso at nagbabanta sa buhay” na kondisyon.

Ayon sa PhilHealth, susuriin ang eligibility ng pasyente batay sa medical necessity, appropriateness at medical justification ng pagkaka-admit, na dapat suportado ng kanilang medical records.

Sinabi ni Christine Mae Magno, acting senior manager ng PhilHealth Corporate Communication Management, na kailangang may sapat na medikal na dahilan ang admission upang maiwasan ang maling paggamit o pang-aabuso sa mga benepisyo.

Saklaw din ng bagong polisiya ang mga pasyenteng kailangang ilipat sa ibang ospital para sa pagpapatuloy ng kanilang gamutan, gayundin ang mga pasyenteng namatay habang naka-confine.

Maaari ring maging kwalipikado ang mga pasyenteng na-admit ngunit nakalabas ng ospital sa loob ng 24 oras, maging ito man ay batay sa payo ng kanilang doktor o sa sarili nilang desisyon.

Hindi naman kabilang sa coverage ang mga pasyenteng dead on arrival, gayundin ang mga kondisyong maaaring gamutin sa pamamagitan ng outpatient services, emergency department, ambulatory care o primary care.

Ipinaliwanag ni PhilHealth spokesperson Alfred Philip de Dios na ang 24-oras na panahon ay mahigpit na binibilang kada oras, simula sa oras na pormal na in-admit ang pasyente.

Ayon kay de Dios, magsisimula ang bilang sa sandaling maibigay ang admission order ng doktor, kahit nasa emergency room pa ang pasyente.

Kapag lumampas sa 24 oras ang confinement, maaari nang ma-avail ng pasyente ang iba pang inpatient benefits, alinsunod sa umiiral na mga patakaran ng PhilHealth.

Ayon kay Magno, layunin ng bagong polisiya na tugunan ang mga kakulangan sa dating benefit packages ng PhilHealth, na nangangailangan noon ng minimum na panahon ng confinement bago maging kwalipikado ang isang miyembro para sa inpatient coverage.

Sa ilalim ng bagong circular, kung kinakailangang ma-admit ang isang pasyente ngunit pinayagan na siyang umuwi ng doktor bago umabot ng 24 oras, maaari pa ring mabayaran ng PhilHealth ang mga serbisyong aktuwal na ibinigay sa pasyente, basta’t natugunan ang mga itinakdang kondisyon.

Ang pagbabago sa polisiya ay kasunod ng isang viral social media post noong Hunyo tungkol kay Maria Sulit, na nagsabing namatay ang kanyang asawang miyembro ng PhilHealth wala pang 24 oras matapos ma-confine sa ospital.

Ayon sa naturang post, hindi umano nakatanggap ng PhilHealth benefits ang pamilya dahil hindi umabot sa 24 oras ang confinement ng kanyang asawa.

Bagama’t hindi sinabi ng PhilHealth na ang naturang kaso lamang ang naging dahilan ng pagbabago ng polisiya, ipinahiwatig ni Magno na kabilang sa mga konsiderasyong tiningnan ng ahensya ang mga puna at saloobin ng publiko.

Aniya, ang mga nakalap na feedback ng publiko ay isinasaalang-alang ng mga policy officer sa pagbuo at pagpapalawak ng mga polisiya ng PhilHealth.