PATAY ang isang police intelligence officer at dalawang suspek sa isinagawang buy-bust operation laban sa ilegal na pagbebenta ng baril sa Pagadian City madaling-araw nitong Linggo, Agosto 23.

Kinilala ng mga awtoridad ang nasawing pulis na si Police Maj. Aiman Khuzaimah Pantaran, 35, intelligence officer ng Pagadian City Police Station (PCPS) at residente ng Barangay Tiguma.

Pinangunahan ni Pantaran ang operasyon dakong alas-12:15 ng madaling-araw sa Purok Malipayon, Barangay Dao, Pagadian City, laban sa mga indibidwal na umano’y sangkot sa ilegal na pag-iingat at pagbebenta ng mga baril.

Sa kasagsagan ng transaksyon, ay nakahalata umano ang dalawang suspek na mga pulis ang kanilang kausap at bigla silang bumunot ng baril at pinaputukan sila Pantaran.

Tinamaan si Pantaran ng bala sa itaas na bahagi ng kanyang dibdib na agad niyang ikinasawi.

Habang ang mga suspek ay kapwa wala ng buhay na bumulagta matapos silang gantihan ng putok ng mga operatiba.

Sinubukan pang I revive si Pantaran sa Mendero Medical Center (MMC) subalit idineklara na siyang patay ni attending physician Dr. Alfaro Danilo dakong alas-12:50 ng madaling-araw.

Dinala sa isang funeral home sa lungsod ang mga labi ng dalawang suspek, habang iniuwi naman sa kanyang pamilya sa Barangay Tiguma ang labi ni Pantaran.

Patuloy ang imbestigasyon ng pulisya sa insidente kabilang ang mga nasa likod ng malawakang ilegal na pagbebenta ng mga baril sa lalawigan.